होण्डाले नेपाल ल्यायो नयाँ एड्भेन्चर टुरर मोटरसाइकल, यस्तो छ मूल्य र फिचर

काठमाडौं– होण्डाको नयाँ एड्भेन्चर टुरर मोटरसाइकल ‘एनएक्स २००’ नेपाल आएको छ । नेपालका लागी आधिकारिक वितरक स्याकार ट्रेडिङ कम्पनीले उक्त मोटरसाइकलको मूल्य ४ लाख ८० हजार तोकेर बुकिङ खुल्ला गरेको हो । सो नयाँ मोटरसाइकलले हिरो एक्सपल्स २०० संग सिधा प्रतिस्पर्धा गर्ने अनुमान गर्न सकिन्छ ।

हर्नेट २.० मोडलको प्लेटफर्म सेयर गरी निर्माण गरिएको सो नयाँ मोटरसाइकलमा १८४.४० सिसी क्षमताको बिएस६, सिंगल सिलिन्डर, एफआई इन्जिन जडान गरिएको छ । उक्त इन्जिनले १७.२६ पीएस पावर र १५.९ एनएम टर्क जेनेरेट गर्दछ । ५ स्पिड गियरवक्स जडान गरिएको बाइकलाई १३० किलोमिटर प्रतिघण्टाको उच्च गतिमा हाँक्न सकिन्छ । यो नयाँ मोटरसाइकलमा होण्डाले एयर कुल्ड सिस्टम दिएको छ ।

१२ लिटर क्षमताको इन्धन ट्यांक जडान गरिएको मोटरसाइकलले एक लिटर पेट्रोलको खपतमा ४५ किलोमिटर माइलेज दिने दावी गरिएको छ । बाइकमा सिंगल च्यानल एबिएस पाउन सकिन्छ । सिट हाइट ८१० एमएम रहेको एनएक्स २०० को ग्राउन्ड क्लिरियन्स १६७ एमएम छ ।

अर्बान एक्सप्लोरर स्टाइलमा निकै नै आकर्षक र स्पोर्टी देखिने सो नयाँ मोटरसाइकलमा एलइडी हेडल्याम्प, एक्स आकारको एलइडी टेल लाइट, डिजिटल एलसिडी मिटर, स्प्लिट सिट, इन्जिन स्टप स्विच, हाजार्ड लाइट स्विच, अगाडी यूएसडी फोर्क तथा पछाडी मोनोशक सस्पेन्सन र डुअल डिस्क ब्रेक लगायत फिचर पाउन सकिन्छ ।