शिक्षा र स्वास्थ्य क्षेत्रमा ६ करोड रुपैयाँ सहयोग

दार्चुला। भारतीय राजदूतावासले दार्चुलामा शिक्षा र स्वास्थ्य क्षेत्रमा छ करोड रुपैयाँ सहयोग गर्ने भएको छ । दुहुँ गाउँपालिका वडा नं ३ स्थित जनविकास माध्यमिक विद्यालय बारबाज र नौगाडको इयरकोट स्वास्थ्य चौकी भवनलगायतका संरचना निर्माणका लागि भारतीय राजदूतावासले सहयोग गर्ने भएको हो ।

यसका लागि भारतीय राजदूतावास र नेपाल सरकार सङ्घीय मामिला तथा सामान्य प्रशासन मन्त्रालय, दुहुँ गाउँपालिका र नौगाड गाउँपालिकाका प्रतिनिधिबीच समझदारीपत्रमा हस्ताक्षर भएको छ ।

यस्तै नौगाड गाउँपालिका वडा नं १ स्थित इयरकोट स्वास्थ्यचौकी भवन निर्माणका लागि भारतले कूल रु दुई करोड ५३ लाख सहयोग गर्ने भएको छ । भारतीय राजदूतावासले समुदायमा उच्च प्रभाव विकास योजनाअन्तर्गत यो अनुदान सहयोग गर्न लागेको हो । यी परियोजनाको निर्माणले स्थानीय बासिन्दालाई राम्रो शिक्षा र स्वास्थ्य सेवा सुविधा प्राप्त हुने विश्वास भारतीय दूतावासको छ ।

नेपालका सातैवटा प्रदेशमा विशेष गरी तल्लो तहमा स्वास्थ्य, शिक्षा, खानेपानी, कनेक्टिभिटी, सरसफाइ तथा अन्य सार्वजनिक संरचनाको निर्माण जस्ता विविध क्षेत्रमा सन् २००३ यता भारतले ५२४ भन्दाबढी उच्च प्रभाव सामुदायिक विकास परियोजना अघि बढाइसकेको छ भने ४६७ वटा परियोजना सम्पन्न गरिसकेको छ ।