तनहुँको व्यास नगरपालिकाले खेर गइरहेको फोहाेर व्यवस्थापन गरी आम्दानी गर्न थालेको छ । पहिलो चरणमा नकुहिने फोहाेरलाई मोहरमा बदल्ने सोचसहित सूक्ष्म रूपमा वर्गीकरण गरी बिक्री गर्न थालेको हो ।
विगत लामो समयदेखि नकुहिने फोहाेरलाई खाडल खनेर पुर्दै आएकामा हाल कार्यालयपरिसरमै व्यवस्थापन गरी बिक्री गरिरहेको वन, वातावरण तथा सरसफाइ शाखा प्रमुख कृष्ण घिमिरेले जानकारी दिए। नगरपालिकाले रु. ५० हजारबराबरको सिसाको बोतल बिक्री गरिसकेको छ। अन्य प्लास्टिक, कपडा, फलाम र सिसाजन्य वस्तु बिक्रीका लागि बोलपत्र आह्वान गरेको छ ।
नगरपालिकाले न्यूनतम दररेट कायम गरी १५ दिनको सूचना जारी बोलपत्र आह्वान गरेको हो। जसअनुसार रेडबुललगायत आल्मुनियम प्रतिकेजी रु. ५०, फलाम प्रतिकेजी रु. २८, टिन रु. २०, पानीको बोतल तथा अन्य बोतल रु. २०, कपडा चार रुपैयाँ ५० पैसा, कपी रु. १५, किताब रु. १४ दररेट कायम गरिएको नगरपालिकाले जनाएको छ ।
नगरपालिकाले यसअघि वडा नं. ३ मादी नदी किनारस्थित भतेरीमा नकुहिने फोहाेर व्यवस्थापन गर्दै आएको थियो। त्यस क्षेत्रको सम्झौता अवधि सकिएकाले अर्को व्यवस्था नहुँदासम्म कार्यालयपरिसरबाटै फोहाेर व्यवस्थापन गर्न लागिएको व्यासका प्रमुख प्रशासकीय अधिकृत काशीराम गैरेले जानकारी दिए ।
उनका अनुसार फोहाेर व्यवस्थापनका लागि व्यास नगरपालिकाको पुरानो सभाहल र बाहिरी क्षेत्रमा ट्रस निर्माण गरी फोहाेर वर्गीकरण गरिएको छ। नगरपालिका क्षेत्रमा हाल दैनिक १५ टन नकुहिने र सात टन कुहिने फोहाेर संकलन हुने गरेको छ। कुहिने फोहाेरलाई व्यास–१० स्थित गौ संरक्षण केन्द्र भतेरीमा व्यवस्थापन गर्दै आएको छ । नकुहिने फोहाेरको दिगो व्यवस्थापनका लागि वडा नम्बर १३ मा जग्गा खरिद प्रक्रिया अगाडि बढाइएको नगरपालिकाले जनाएको छ ।
प्रमुख प्रशासकीय अधिकृत गैरेले प्लास्टिक, सिसा, कपडा र फलामलगायत नकुहिने वस्तुलाई ६ किसिमले सूक्ष्म वर्गीकरण गरी बिक्री गर्ने योजना अघि बढाइएको जानकारी दिए। यसबाट मासिक रु. एक लाखभन्दा बढी आम्दानी गर्ने लक्ष्य राखिएको छ। सरसफाइ शाखाका कर्मचारी परिचालन गरी नकुहिने वस्तु वर्गीकरण थालिएको उनले बताए ।
भारतबाट किनेर ल्याएको ‘बेलिङ’ मेसिन नगरपालिकापरिसरमा जडान गरी नकुहिने प्लास्टिकजन्य, फलामजन्य र कागजजन्य वस्तुलाई ठूलो आकारबाट सानो आकार बनाउने काम भइरहेको छ। उक्त मेसिनले ठूलो आकारको वस्तुलाई थिचेर सानो आकार बनाउनुका साथै आफैँले ‘ब्यान्डिङ’ गर्ने नगरप्रमुख वैकुण्ठ न्यौपानेले बताए ।
सरसफाइ क्षेत्रमा लाखौँ खर्च गर्दै आएकामा अब फोहाेरबाट आम्दानी गर्ने लक्ष्यअनुरूप प्रक्रिया अघि बढाएको छ ।
Discover more from nigranidainik - focus of investigative.
Subscribe to get the latest posts sent to your email.