कांग्रेस र एमाले गठबन्धन सरकारको सय दिन पूरा

काठमाडौं । संघिय संसदका दुई ठूला दल नेपाली कांग्रेस र नेकपा एमाले गठबन्धनको सरकार गठन भएको आज सय दिन पूरा भएको छ । यो अवधिमा सरकारले उल्लेख्य उपलब्धीहरु हाँसिल गरेको दाबी गरे पनि आम जनतामा भने आशाको सञ्चार हुन सकेन ।

प्रधानमन्त्री केपी शर्मा ओलीको नेतृत्वमा नयाँ सरकार गठन भएको मंगलबार एक सय दिन पूरा भएको छ । आमनागरिकमा देखिएको निराशा चिर्दै राजनीतिक स्थिरता कायम गर्ने, अर्थतन्त्रलाई चलायमान बनाउने र संविधान संशोधन गर्ने मुख्य लक्ष्यसहित गठन भएको सरकारले सय दिनमा नागरिकले महशुस गर्ने गरी प्रगति हाँसिल गर्न सकेन । सरकारले यो अवधिमा उल्लेख्य प्रगति हाँसिल भएको फेहरिस्त बनाइरहँदा आम नागरिकमा भने आशा भन्दा निराशाको मात्रा बढी देखिएको छ ।

नयाँ कामको थालनी गर्ने भन्दा सम्पन्न हुन बाँकी कामलाई प्राथमिकता दिने कुरा प्रधानमन्त्री ओलीले पदबहालीका क्रममा बताउनु भएको थियो । यद्यपि यो अवधिमा खासै नयाँ कामको शुरुवात भएन भने पुराना कामले पनि सोचेजस्तो गति लिन सकेन । प्रधानमन्त्र िओलीले अघिल्लो कार्यकालमा उद्घाटन गरेर पनि सञ्चालनमा आउन नसकेको धरहरा यो अवधिमा सञ्चालनमा आएको छ । तर, त्यसको निर्माण कार्य भने अझै पूर्णरुपमा भइसकेको छैन । केही सडक र पुलको निर्माण कार्यले गति लिएको छ भने मेलम्चीको पानी वितरण प्रारम्भ गरिएको छ । तर, त्यो पनि धरहरा जस्तै अपुरो रुपमै छ । यस अवधिमा सरकारले सेवा प्रवाहलाई चुस्त बनाउने घोषणा गरेको थियो । नागरिकहरु लामो लाइनमा बस्ने अवस्थाको अन्त्य गरिने भनेको थियो । तर, त्यसमा पनि खासै सुधार हुन सकेन ।

संविधान संशोधनको एजेण्डामा यो अवधिमा कुनै पनि काम भएन । सरकारले कार्यसम्पादन सम्झौता र कामको मूल्यांकन प्रणालीलाई स्थापित गर्ने प्रयास अघि बढायो । प्रधानमन्त्रीले मन्त्रीसँग, मन्त्रीले सचिवसँग र सचिवले अन्तर्गतका पदाधिकारी तथा संस्था प्रमुखसँग कार्य सम्पादन सम्झौता गर्ने काम गरियो । यसलाई कडाइका साथ पालना गर्न निर्देशन दिने काम पनि पटक पटक भयो । तर, न त्यस अनुसार काम भयो न कुनै मूल्यांकन नै । बरु कहिले विद्युतको बक्यौता भुक्तानी प्रकरण त कहिले पदाधिकारी बर्खास्त र नियुक्तिका विषयले सरकार विवादमा रुमलिने स्थिति बन्यो ।