सरकारको कामप्रति काँग्रेस सन्तुष्ट रहेको सभापति देउवाको भनाइ

काठमाडौँ । नेपाली काँग्रेसका सभापति एवं पूर्वप्रधानमन्त्री शेरबहादुर देउवाले सरकारको सय दिनको कामप्रति काँग्रेस सन्तुष्ट रहेको बताउनु भएको छ ।

नेकपा एमाले अध्यक्ष केपी शर्मा ओली नेतृत्वको सरकारले सय दिनमा गरेको कामबाट असन्तुष्टि जनाउनुपर्ने कुनै कारण नरहेको सभापति देउवाको भनाइ छ । न्युज एजेन्सी नेपालसँगको कुराकानीमा उहाँले हनिमुन डेजमा सरकारले राम्रो काम गरेको बताउनुभयो ।

सभापति देउवाले सबै किसिमबाट सरकारले गति लिएको बताउनुभयो । विपद् व्यवस्थापन र राहत, उद्धारमा सरकारले कामै गरेन भनेर भ्रम फैलाइएको बताउँदै उहाँले राहत तथा खोजी उद्धारमा सरकारले आफ्नो हिसावले सुरक्षाकर्मीहरू तैनाथ गरी व्यवस्थापन गरेको बताउनुभयो ।

वर्तमान सरकार पूरा कार्यकाल जाने र एमाले—काँग्रेसको सरकार बनेको दिनदेखि दुई वर्ष प्रधानमन्त्री ओलीले सरकारको नेतृत्व गर्ने र बाँकी डेढ वर्ष आफूले नेतृत्व गर्ने सभापति देउवाले बताउनुभयो ।