स्थानीय सरोकार/राजविराज
।
तिलाठी कोइलाडी गाउँपालिकालाई बालविवाहमुक्त घोषणा गर्नु स्वागतयोग्य र प्रशंसनीय
कदम हो। बालविवाह जस्तो सामाजिक कुप्रथाविरुद्ध स्थानीय तहले स्पष्ट प्रतिबद्धता
जनाउनु केवल कानुनी उपलब्धि मात्र होइन, सामाजिक चेतनाको
संकेत पनि हो। यस घोषणाले बालबालिकाको शिक्षा, स्वास्थ्य र
सुरक्षित भविष्यप्रति पालिकाको दायित्वबोध झल्काउँछ।
बालविवाहका कारण बालिकाको शिक्षा विच्छेद, मातृ तथा
शिशु स्वास्थ्यमा जोखिम, गरिबीको दुष्चक्र र लैंगिक असमानता झन्
गहिरिँदै आएको यथार्थ हामी सामु छ। यस्तो पृष्ठभूमिमा तिलाठी कोइलाडीले समुदाय, जनप्रतिनिधि, शिक्षक, अभिभावक
र सुरक्षानिकायलाई समेट्दै बालविवाह अन्त्यतर्फ कदम चाल्नु अनुकरणीय अभ्यास हो।
तर घोषणा आफैंमा अन्तिम उपलब्धि होइन। वास्तविक चुनौती
घोषणा पछिको कार्यान्वयनमा निहित छ। लुकेर हुने बालविवाह, सामाजिक
दबाब, गरिबी र परम्परागत सोच अझै पनि चुनौतीका रूपमा कायम छन्।
त्यसैले नियमित अनुगमन, विद्यालयमा निरन्तर भर्ना सुनिश्चितता, किशोरीमैत्री
कार्यक्रम, अभिभावक सचेतना र कडाइका साथ कानुनको पालना अपरिहार्य छ।
स्थानीय तह, समुदाय र
परिवारबीचको सहकार्य बिना बालविवाह पूर्ण रूपमा अन्त्य हुन सक्दैन। तिलाठी
कोइलाडीको यो घोषणा अन्य पालिकाका लागि प्रेरणा बन्न सक्छ—तर त्यसका लागि
शब्दभन्दा कर्म बलियो हुनुपर्छ। बालविवाहमुक्त घोषणालाई कागजमै सीमित नराखी
व्यवहारमा उतार्न सके मात्रै यसले बालबालिकाको जीवनमा वास्तविक परिवर्तन ल्याउनेछ।
अब तिलाठी कोइलाडीको अग्निपरीक्षा यही हो—घोषणालाई दिगो अभ्यासमा रूपान्तरण गर्ने।
