पुनले सामाजिक सञ्जालमार्फत आफूले लामो समयदेखि उठाउँदै आएको माग पूरा भएको बताएका हुन् । उनले दुई दिनअघि संसदमा उठाएको माग र त्यसअघि प्रधानमन्त्रीलाई बुझाएको लिखित आग्रहको समेत स्मरण गराएका छन् ।
उनले प्रधानमन्त्रीलाई बुझाएको पत्रमा छुट्टै विज्ञान, प्रविधि, अनुसन्धान तथा नवप्रवर्तन मन्त्रालय गठन गर्नुपर्ने आवश्यकता औंल्याएका थिए । पत्रमा नेपालले विज्ञान, अनुसन्धान र नवप्रवर्तनलाई प्राथमिकता नदिँदा देश आर्थिक तथा प्राविधिक रूपमा पछाडि परेको उल्लेख गरिएको छ ।
पुनले नेपालमा दैनिक उपभोगका सामान्य वस्तुसमेत विदेशबाट आयात गर्नुपर्ने अवस्था सिर्जना भएको तथा प्रतिभाशाली युवा विदेश पलायन भइरहेका कारण देशमा रोजगारी र उत्पादन वृद्धि हुन नसकेको बताएका छन् ।
सरकारको निर्णयपछि उनले अब मन्त्रालयलाई प्रभावकारी रूपमा सञ्चालन गर्न दक्ष, देशभक्त वैज्ञानिक, अनुसन्धानकर्ता र प्राविधिक व्यक्तिहरूलाई छलफलमा सहभागी हुन आग्रह गरेका छन् ।
साथै उनले नेपाल सरकारलाई धन्यवाद दिँदै देशको हितका लागि मन्त्रालयले दीर्घकालीन काम गर्ने विश्वास व्यक्त गरेका छन् ।
पुनले भावुक शैलीमा आफूले विगतमा आक्रोशमा नेताहरुलाई दिएको “श्राप” समेत फिर्ता लिएको उल्लेख गरेका छन् ।
