सप्तरीका अजयकुमार यादव सेक्युरिटी गार्डको रोजगारीका लागि मलेसिया जान तयारी अवस्थामा थिए । उनको उडान वैशाख २९ गतेका लागि तय भइसकेको थियो । सरकारले लागू गरेको ‘फ्रि भिसा, फ्रि टिकट’ नीतिअनुसार म्यानपावर कम्पनीलाई अधिकतम १० हजार रुपैयाँ मात्रै तिर्नुपर्ने व्यवस्था भए पनि उनले यसअघि नै ७० हजार रुपैयाँ बुझाइसकेका थिए ।
तर, कोटेश्वरस्थित ‘ग्रान्ड स्वीट जब’ नामक म्यानपावर कम्पनीले थप ३ लाख रुपैयाँ नतिरेसम्म विदेश पठाउन नसकिने अडान लिएपछि यादवको वैदेशिक रोजगारीको सपना अधुरै बन्न पुगेको थियो । रोजगारदाता कम्पनीबाट भिसा र टिकट आइसकेको भए पनि रकम अभावका कारण उनी निर्धारित मितिमा उड्न सकेनन् ।
म्यानपावर कम्पनीले बाँकी २ लाख २० हजार रुपैयाँ बुझाए जेठ ३ गते मलेसिया पठाइदिने बताएपछि यादवले विभिन्न ठाउँबाट रकम जुटाउने प्रयास गरे । त्यसपछि उनी शनिबार बिहान काठमाडौं आइपुगेका थिए ।
काठमाडौं पुगेपछि म्यानपावरका एक कर्मचारीले उनलाई फोन गरी राहदानी र अन्य कागजात आफूसँग रहेको भन्दै तीनकुनेस्थित गैरीगाउँको पेट्रोलपम्प अगाडि पैसा लिएर आउन निर्देशन दिएका थिए ।
यसबीच यादवले आफू ठगिएको गुनासो श्रम, रोजगार तथा सामाजिक सुरक्षा मन्त्री रामजी यादवको सचिवालयमा पुर्याएका थिए । उनी मन्त्री यादवकै निर्वाचन क्षेत्रका नागरिकसमेत हुन् ।
घटनाबारे जानकारी पाएपछि मन्त्रीका स्वकीय उपसचिव सरोज यादव आफैं सक्रिय बने । केही सञ्चारकर्मी र प्रहरी टोलीसहित उनीहरू तीनकुनेस्थित भेट हुने स्थानमा पुगेका थिए ।
त्यहाँ पुगेपछि म्यानपावरका कर्मचारीले अजयसँग रकम मागेका थिए । अजयले भने राहदानी र कागजात पाएपछि मात्रै पैसा दिने अडान लिए । दुवै पक्षबीच केहीबेर विवाद भएपछि प्रहरीले ती कर्मचारीलाई नियन्त्रणमा लिएको थियो ।
प्रहरीको प्रारम्भिक अनुसन्धानका क्रममा ती कर्मचारीले ‘फ्रि भिसा, फ्रि टिकट’ प्रणालीअन्तर्गत १० हजार रुपैयाँमै हुने प्रक्रियामा ३ लाख रुपैयाँ मागिएको स्वीकार गरेका थिए । त्यसपछि उनलाई थप अनुसन्धानका लागि काठमाडौं उपत्यका अपराध अनुसन्धान कार्यालय पठाइएको प्रहरीले जनाएको छ ।
पक्राउ परेका व्यक्तिको साथबाट चार वटा राहदानी, हवाई टिकट र अन्य महत्वपूर्ण कागजातसमेत बरामद गरिएको छ । प्रहरीका अनुसार ती कागजात सम्बन्धित व्यक्तिबाट रकम उठाएर मात्र फिर्ता गर्ने योजना बनाइएको देखिएको छ ।
श्रम मन्त्रालयले वैदेशिक रोजगारीको नाममा सर्वसाधारण कामदारलाई ठगी गर्ने र सरकारले तोकेको शुल्कभन्दा लाखौं रुपैयाँ असुल्ने प्रवृत्तिविरुद्ध कडा कारबाही गरिने जनाएको छ ।
मन्त्री यादवका स्वकीय सचिव सरोज यादवले एक निर्दोष नेपालीलाई ठगीबाट जोगाउन सफल भएको उल्लेख गर्दै यस कार्यमा सहयोग गर्ने प्रहरी टोलीलाई धन्यवाद दिएका छन् ।
यादवले झापास्थित शाखा कार्यालयमार्फत मलेसिया जाने सम्पूर्ण प्रक्रिया पूरा गरेका थिए । तर अन्तिम समयमा म्यानपावरले ३ लाख १० हजार रुपैयाँ माग गर्दै राहदानी, श्रम स्वीकृति र टिकट रोकेर राखेको आरोप लागेको छ ।
पीडित यादवले आफूलाई सुरुवातमा कुनै अतिरिक्त शुल्क नलाग्ने भनिए पनि भिसा आएपछि ठूलो रकम माग्दै धम्की दिन थालिएको बताएका छन् । उनले ऋण खोजेर पैसा जुटाउन बाध्य भएको उल्लेख गर्दै यस्ता ठगीमा संलग्नमाथि कडा कारबाही हुनुपर्ने माग गरे ।
प्रहरीको हस्तक्षेपपछि यादवको राहदानी, श्रम स्वीकृति, बीमा र हवाई टिकट फिर्ता गरिएको छ । अब उनी आइतबार मलेसिया जान पाउने सुनिश्चित भएको जनाइएको छ ।
श्रम मन्त्रालयले वैदेशिक रोजगारीका क्रममा कुनै समस्या परेमा सिधै मन्त्रालयमा सम्पर्क गर्न सबैलाई आग्रह गरेको छ । पक्राउ परेका एजेन्टमाथि थप अनुसन्धान र कानुनी प्रक्रिया अघि बढाइएको प्रहरीले जनाएको छ ।
