काठमाडौं । जातीय विभेद, सामाजिक उत्पीडन र दलितमाथि भइरहेका शृंखलाबद्ध हिंसाविरुद्ध राजधानीको माइतीघर मण्डलामा प्रतिरोधात्मक प्रदर्शन गरिएको छ । जात व्यवस्था उन्मूलन मोर्चा नेपाल प्रथम राष्ट्रिय सम्मेलन आयोजक समितिको अगुवाइमा आयोजित कार्यक्रममा देशका विभिन्न जिल्लाबाट आएका उत्पीडित समुदाय, मानवअधिकारकर्मी तथा बुद्धिजीवीहरूको उल्लेख्य सहभागिता रहेको थियो ।
प्रदर्शनलाई
“ऐतिहासिक विद्रोह दिवस” का रूपमा मनाइएको आयोजकहरूले बताएका छन् । प्रेम
सम्बन्धकै कारण ६ वर्षअघि रुकुम सोती घटनामा नवराज विकसहित ६ जना युवाको हत्या
गरिएको स्मरण गर्दै उनीहरूको सम्मान र न्यायका लागि यो प्रतिरोध कार्यक्रम गरिएको
जनाइएको छ ।
र्यालीमा सहभागी
युवाहरूले अन्तरजातीय विवाह र प्रेमलाई अझै पनि अपराधझैं व्यवहार गरिनु
लोकतान्त्रिक व्यवस्थामाथिकै प्रश्न भएको बताएका छन् । “हाम्रो श्रम स्वीकार गर्ने
तर प्रेम स्वीकार नगर्ने जातिवादी सोच अन्त्य हुनुपर्छ” भन्ने सन्देशसहित उनीहरूले
विभिन्न प्लेकार्ड प्रदर्शन गरेका थिए ।
प्रदर्शनकारीहरूले
भूमिहीन दलित समुदायलाई खेतीयोग्य जमिन उपलब्ध गराउन, दलित विद्यार्थीका लागि छात्रवृत्तिसहित निःशुल्क शिक्षाको
सुनिश्चितता गर्न तथा दलितमाथि भएका हत्या र हिंसाका घटनाको निष्पक्ष छानबिनका
लागि उच्चस्तरीय स्वतन्त्र आयोग गठन गर्न सरकारसँग माग गरेका छन् ।
