काठमाडौं । राष्ट्रिय परीक्षा बोर्ड, परीक्षा नियन्त्रण कार्यालय कक्षा १० सानोठिमी भक्तपुरले माध्यमिक शिक्षा परीक्षा (SEE) २०८२ को नतिजा अबको दुई दिनभित्र सार्वजनिक गर्ने तयारी गरेको छ ।
यसअघि SEE नतिजा सार्वजनिक गर्न झन्डै तीन महिना लाग्ने गरेको थियो । बोर्डको वार्षिक क्यालेन्डरअनुसार असार दोस्रो सातातिर नतिजा प्रकाशित हुँदै आएकोमा यसपटक भने छिटो प्रक्रिया अघि बढाइएको हो ।
बालेन शाह नेतृत्वको सरकार बनेपछि नतिजा एक महिनाभित्र सार्वजनिक गर्ने निर्णय गरिएको थियो । सोही निर्णयअनुसार राष्ट्रिय परीक्षा बोर्डले तयारी तीव्र बनाएको जनाएको छ ।
बोर्डले सार्वजनिक गरेको सूचनाअनुसार विद्यार्थीहरूले SEE २०८२ को नतिजा SMS, IVR तथा विभिन्न वेबसाइटमार्फत हेर्न सक्नेछन् ।
SMS तथा IVR सेवाका लागि नेपाल टेलिकमको १६०० सर्टकोड प्रयोग गर्न सकिनेछ भने जानकी टेक्नोलोजी र एम्बिसन गुरुमार्फत पनि SMS सेवा उपलब्ध हुने जनाइएको छ ।
त्यस्तै, नतिजा हेर्नका लागि बोर्डको आधिकारिक वेबसाइट www.see.gov.np र www.neb.gov.np सहित नेपाल टेलिकम, ईकान्तिपुर, एडुसञ्जाल, खल्ती, एनसेललगायत विभिन्न प्लेटफर्म प्रयोग गर्न सकिने बोर्डले जनाएको छ ।
