सर्लाहीमा निर्माणाधीन भवनको छत भत्किँदा दुई जना मजदुरको ज्यान गएको छ ।
मृत्यु हुनेमा मलंगवा नगरपालिका–२ निवासी ५० वर्षीय छटु साह र हरिपुर्वा नगरपालिका–२ का ४० वर्षीय राजकिशोर यादव रहेको प्रहरीले जनाएको छ ।
जिल्ला प्रहरी कार्यालय सर्लाहीका अनुसार मलंगवा नगरपालिका–१० मा रञ्जित यादवले निर्माण गरिरहेको चार तले घरको छतमा पानी ट्याङ्की राख्न तयार पारिएको ढलानमा प्लास्टर गर्ने क्रममा दुर्घटना भएको हो । बुधबार दिउँसो करिब पौने ५ बजेतिर काम गरिरहेका बेला अचानक छत भत्किएर उनीहरू तल खसेका थिए ।
दुर्घटनामा दुवै जनाको शरीरमा गम्भीर चोट लागेको प्रहरीले जनाएको छ । घाइते अवस्थामा तत्काल प्रादेशिक अस्पताल मलंगवामा पुर्याइए पनि चिकित्सकले उनीहरूलाई मृत घोषणा गरेका थिए ।
घटनाबारे थप अनुसन्धान भइरहेको जिल्ला प्रहरी कार्यालय सर्लाहीले जनाएको छ ।
