निगरानी ब्यूरो/काठमाडौँ । हालै सार्वजनिक भएको अङ्शु हत्याकान्डले देशभरि ठूलो दुख, आक्रोश र चिन्ता निम्त्याएको छ। खासगरी, घटनामा संलग्न भएको आरोपमा छिमेकी व्यक्तिनै पक्राउ परेपछि सुरक्षा, विश्वास र सामाजिक संरचनाबारे गम्भीर प्रश्न उठेका छन्।
छिमेकीबीचको आपसी भरोसा समुदायको आधार हो; तर यस्ता घटनाले त्यो आधार कमजोर भएको संकेत दिन्छ।
लामो समयसम्म घटनाका दोषी पक्राउ नगरेको भन्दै प्रहरीको आलोचना भइरहेको बेला गौतमको हत्या आरोपमा छिमेकी पदम अधिकारी पक्राउ परेका हुन् । ५६ वर्षीय अधिकारीलाई नियन्त्रणमा लिएर सोधपुछ गरिरहेको प्रहरीले जनाएको छ । प्रहरी श्रोतका अनुसार हत्यामा पदमकै संलग्नता रहेको भेटिएको छ ।
असोज २१ गते दिउँसो घरबाट निस्किएकी उनको बेलबारी चिसाङ सामुदायिक वनमा टाउको र शरीर छुट्टिएको अवस्थामा शव फेला परेको थियो । पदमले उनको हत्या गर्नुपर्ने कारण तथा कसरी हत्या गरियो भनेर प्रहरीले केही खुलाएको छैन । अनुसन्धानमा सम्लग्न अधिकारीले भने, ‘अभिभावकसँगको पुरानो रिसइबीका कारण नियोजित हिसाबले उनको हत्या भएको सक्छ !
यस घटना अनुसन्धानका लागि प्रहरीद्वारा भएको छिटोभन्दा छिटो कारबाही सराहनीय छ। तर यति संवेदनशील मुद्दामा प्रहरी, अभियोजन पक्ष र न्यायालयबीच प्रभावकारी सहकार्य आवश्यक छ, ताकि दोषीले कानुनी प्रक्रियामार्फत उचित सजाय पाओस् र पीडित परिवारले न्यायको अनुभूति गर्न सकोस्।
यस्तै घटनाबाट स्पष्ट हुन्छ ।सुरक्षा चेतना अभिवृद्धि गर्नु समुदायकै प्राथमिकता हुनुपर्छ।स्थानीय तह, विद्यालय, बाल संरक्षण संयन्त्र र समुदायबीच साझेदारी बढाउन आवश्यक छ।बालबालिका र युवाहरूलाई सुरक्षित वातावरण उपलब्ध गराउन नियमित अभिभावक समुदाय सम्वाद अनिवार्य हुँदै गइरहेको छ।
यसबीच, अनुसन्धान पूरा नभएसम्म अफवाह, अनुमान वा द्वेषपूर्ण सामग्री फैलाउने प्रवृत्तिलाई नियन्त्रण गर्नुपर्छ। समाजमा भय होइन, विश्वास र उत्तरदायित्व मजबुत बनाउनेतर्फ सबै पक्षको ध्यान जानु अत्यावश्यक छ।
अङ्शु जस्ता घटनाबाट राज्यले सिक्नुपर्ने कुरा स्पष्ट छ । सुरक्षा, न्याय र समुदायको संवेदनशीलता कमजोर पार्ने कुनै पनि घटना प्रतिरोध गर्न नीति, शिक्षा र सतर्कता सबैलाई सँगै अगाडि बढाउनैपर्नेछ।
