काठमाडौँ । यातायात सेवा कुनै पनि
देशको सार्वजनिक सेवा प्रणालीको महत्वपूर्ण आधार हो। सवारी चालक अनुमतिपत्र, सवारी
दर्ता, नवीकरण, रुट अनुमति तथा
अन्य प्रशासनिक सेवाका लागि दैनिक हजारौँ नागरिक यातायात कार्यालय पुग्ने गर्छन्।
नागरिकले सहज, छिटो र
पारदर्शी सेवा पाउनुपर्ने अपेक्षा राखिरहेका बेला यातायात विभागले सेवा सुधारका
विभिन्न प्रयास अघि बढाइरहेको जनाएको छ।
यातायात विभागका
सूचना अधिकारी केशव खत्रीका अनुसार विभागको मुख्य लक्ष्य सेवाग्राहीलाई गुणस्तरीय, प्रविधिमैत्री
र पारदर्शी सेवा उपलब्ध गराउनु हो। "सेवाग्राहीको समय बचत हुने, अनावश्यक
झन्झट कम हुने र सेवा प्रक्रियामा पारदर्शिता बढ्ने गरी सुधारका काम भइरहेका छन्," उनले
बताए।
उनका अनुसार
विभागले सूचना प्रविधिको प्रयोगलाई प्राथमिकतामा राख्दै अनलाइन सेवाको विस्तारमा
जोड दिएको छ। यसले कार्यालयमा हुने भीड घटाउनुका साथै सेवाप्रति नागरिकको पहुँचलाई
पनि सहज बनाउने विश्वास विभागको छ।
स्मार्ट लाइसेन्स
वितरण, सवारी दर्ता तथा नवीकरणजस्ता सेवालाई व्यवस्थित बनाउन विभाग
निरन्तर काम गरिरहेको खत्रीले बताए। सेवामा ढिलाइ कम गर्न, प्रक्रियालाई
प्रभावकारी बनाउन र सेवाग्राहीको गुनासो सम्बोधन गर्न सम्बन्धित निकायसँग समन्वय
भइरहेको उनको भनाइ छ।
यातायात
क्षेत्रमा बेला–बेला उठ्ने बिचौलियाको विषयमा उनले नागरिकलाई आधिकारिक
प्रक्रियामार्फत मात्रै सेवा लिन आग्रह गरे। विभागले अनियमितता रोक्न निगरानी र
सेवा प्रणाली सुधारलाई निरन्तरता दिएको उनले उल्लेख गरे।
सडक सुरक्षा पनि
विभागको प्राथमिकतामध्ये एक रहेको खत्रीको भनाइ छ। सम्बन्धित निकायसँग सहकार्य
गर्दै सुरक्षित सवारी सञ्चालन, नियम पालना र
जनचेतना अभिवृद्धिमा विभागले आफ्नो भूमिका निर्वाह गरिरहेको उनले बताए।
अन्त्यमा सूचना अधिकारी खत्रीले सेवाग्राहीलाई आवश्यक कागजात पूरा गरी निर्धारित प्रक्रिया अपनाउन, अफवाह वा अनधिकृत व्यक्तिको प्रभावमा नपर्न र विभागका आधिकारिक सूचना तथा सेवामात्रै प्रयोग गर्न आग्रह गरे। उनका अनुसार, नागरिकको विश्वास जित्ने, आधुनिक र सेवाग्राहीमैत्री यातायात प्रणाली निर्माण गर्ने लक्ष्यसहित विभाग निरन्तर अघि बढिरहेको छ।
