ललितपुर । ललितपुर महानगरपालिकाले आगामी आर्थिक वर्षका लागि
करिब ७ अर्ब ४८ करोड रुपैयाँको बजेट प्रस्तुत गरेको छ। महानगरले सुशासन, सम्पदा
संरक्षण, दिगो पूर्वाधार, वातावरण संरक्षण, गुणस्तरीय
शिक्षा, स्वास्थ्य, स्वच्छ खानेपानी तथा युवालाई
रोजगारीसँग जोड्ने कार्यक्रमलाई प्राथमिकतामा राखेको जनाएको छ। बजेटको आकार विगत
वर्षको तुलनामा सामान्य वृद्धि भएको देखिए पनि यसको वास्तविक सफलता खर्चको
प्रभावकारिता र कार्यान्वयन क्षमतामा निर्भर रहनेछ।
ललितपुर नेपालको ऐतिहासिक, सांस्कृतिक र
शहरी सम्पदाले भरिपूर्ण महानगर हो। यहाँ विकास र सम्पदा संरक्षणबीच सन्तुलन कायम
गर्नु सधैं चुनौतीपूर्ण रहँदै आएको छ। त्यसैले बजेटले सडक, ढल, खानेपानी
र डिजिटल सेवाजस्ता आधारभूत पूर्वाधारलाई प्राथमिकता दिनु सकारात्मक पक्ष हो। तर
विगतका अनुभवले देखाएको छ कि बजेट घोषणा मात्र पर्याप्त हुँदैन, समयमै
योजना सम्पन्न हुनु र नागरिकले प्रत्यक्ष लाभ अनुभूति गर्नु नै मुख्य विषय हो।
महानगरले आन्तरिक राजस्व वृद्धिको महत्वाकांक्षी लक्ष्य पनि
राखेको छ। स्थानीय सरकारको वित्तीय आत्मनिर्भरता बढाउन यो आवश्यक कदम भए पनि
करदातामाथि अतिरिक्त भार नपरोस् भन्नेमा ध्यान दिनुपर्छ। राजस्व संकलन र सेवा
प्रवाहबीच स्पष्ट सम्बन्ध देखिन सके मात्र नागरिकको विश्वास मजबुत बन्न सक्छ।
विशेष गरी युवामुखी रोजगार, वातावरणीय
संरक्षण र सम्पदा व्यवस्थापनका क्षेत्रमा परिणाममुखी कार्यक्रम आवश्यक छन्।
ललितपुरका खुला क्षेत्र, सांस्कृतिक सम्पदा र पुरातात्त्विक
संरचनाहरूको संरक्षणलाई बजेटले व्यवहारमै उतार्न सके महानगरको पहिचान थप सुदृढ
हुनेछ।
स्थानीय तहको सफलताको मापन बजेटको आकारले होइन, त्यसले सिर्जना गर्ने परिवर्तनले हुन्छ। ७ अर्ब ४८ करोडको यो बजेटले ललितपुरलाई थप व्यवस्थित, हरित र समृद्ध महानगर बनाउने अवसर दिएको छ। अब नागरिकको अपेक्षा एउटै छ ।बजेट कागजमा होइन, विकासका काममा देखियोस्।
