स्थानीय सरोकार । सार्वजनिक कार्यक्रममा मन्त्रीहरूको अभिव्यक्ति प्रायः राजनीतिक विपक्षमाथि लक्षित हुने गर्छन् । तर कहिलेकाहीँ ती टिप्पणीहरू नीति बहस नभई ठट्टा र व्यंग्यमा सीमित भएपछि त्यसले राजनीतिक संस्कृतिमाथि नै प्रश्न उठाइदिन्छ। हालै मन्त्री पुनले गरेको ‘ओलीकुटी’ सम्बन्धी व्यंग्य त्यस्तै एउटा उदाहरण बनेको छ।
शिक्षा, विज्ञान तथा प्रविधिमन्त्री महावीर पुनले नेकपा (एमाले) का अध्यक्ष केपी शर्मा ओलीको नयाँ निर्माणाधीन घरलाई‘कुटी भनिएको भन्दै व्यंग्य गरेका छन् ।
भक्तपुरको गुण्डुमा केही दिनअघि ओलीपत्नी राधिका शाक्यले आफ्नो घरको शिलान्यास गरेकी थिइन् ।
शिलान्या हुँदै गरेको फोटो र नयाँ बन्न लागेको घरको नक्सा राखेर एमाले नेता महेश बस्नेतले ‘ओलीकुटी को निर्माण सुरु भएको जानकारी दिएका थिए ।
भव्य महललाई कुटी भनिएको भन्दै सामाजिक सञ्जालमा यसबारे निकै चर्चा भएको थियो । सोही विषयमा मन्त्री पुनले पनि व्यंग्य गरेका हुन् ।
मन्त्री पुनले कुटीलाई लिएर गरिएको टिप्पणी इन्जिनियरले दरबारकै नक्सा बनाइदिएछ । राजनीतिक प्रतिस्पर्धाबीच आवश्यक मर्यादित भाषा प्रयोग कति महत्त्वपूर्ण छ भन्ने कुरालाई पुनः स्मरण गराएको छ। लोकतान्त्रिक व्यवस्थामा आलोचना, प्रश्न र बहस स्वाभाविक हुन् तर ती अभिव्यक्तिहरूले सभ्यताको सीमाना नाघ्न नदिनु राज्यशक्तिका जिम्मेवार व्यक्तिहरूको कर्तव्य हो।
सरकार र विपक्षबीचको तानातान जितहारको खेल मात्र होइन; यो नीति, दृष्टि र जनताप्रतिको उत्तरदायित्वको बहस हो। त्यसैले व्यंग्य र कटाक्षका नाममा एकअर्कालाई होच्याउने प्रवृत्ति बढ्दै गए लोकतान्त्रिक संवाद कमजोर हुन्छ, र जनतामा नकारात्मक सन्देश पुग्छ।
यति हुँदाहुँदै पनि, मन्त्री पुनको टिप्पणीले एउटा यथार्थ पनि प्रतिबिम्बित गर्छ । राजनीति अहिले चर्किएको व्यक्तिगत आरोपप्रत्यारोपको मैदान बनेको छ, जहाँ मूल एजेन्डा, विकासका मुद्दा र जनचासोका प्रश्नहरू पछाडि पर्न थालेका छन्।
अन्ततः, राजनीतिक मर्यादाको संरक्षण सत्तापक्ष र विपक्ष दुवैको साझा जिम्मेवारी हो। व्यक्तिवादी अभिव्यक्तिभन्दा नीतिगत बहसमा जोड दिने परम्परा विकास गर्न सके मात्र स्वस्थ राजनीतिक संस्कृतिको निर्माण सम्भव हुन्छ।
