स्थानीय सरोकार । गोकर्णेश्वर नगर
अस्पतालमा अत्याधुनिक टीबी परीक्षण मेसिन स्थापना गरिएको छ। क्षयरोग (टीबी)
नेपालमा अझै पनि प्रमुख जनस्वास्थ्य चुनौतीका रूपमा रहेको छ। यस्तो अवस्थामा
गोकर्णेश्वर नगर अस्पतालमा अत्याधुनिक टीबी परीक्षण मेसिन स्थापना हुनु स्थानीय
स्वास्थ्य सेवाका लागि मात्र होइन, समग्र जनस्वास्थ्य व्यवस्थापनका लागि पनि महत्वपूर्ण
उपलब्धि हो।
यसअघि माइक्रोस्कोपमार्फत एकपटकमा एक
जनाको मात्र खकार परीक्षण गर्न सकिने सीमित व्यवस्थाका कारण परीक्षणमा समय लाग्ने, सेवाग्राहीले पालो
कुर्नुपर्ने तथा रोग पहिचानमा ढिलाइ हुने समस्या थियो। अब नयाँ प्रविधिको मेसिनबाट
एकैपटक १६ जनासम्मको खकार परीक्षण गर्न सकिने भएपछि टीबीको समयमै पहिचान, स्क्रिनिङ र उपचार
प्रक्रिया उल्लेखनीय रूपमा प्रभावकारी बन्ने अपेक्षा गरिएको छ।
क्षयरोग नियन्त्रणमा सबैभन्दा
महत्वपूर्ण पक्ष भनेकै छिटो र सही परीक्षण हो। प्रारम्भिक चरणमै रोग पहिचान हुन
सके उपचार सफल हुने सम्भावना बढ्नुका साथै समुदायमा संक्रमण फैलिने जोखिम पनि कम
हुन्छ। त्यसैले यस्तो प्रविधिमा गरिएको लगानीलाई स्वास्थ्य क्षेत्रमा दीर्घकालीन
लगानीका रूपमा लिनुपर्छ।
मेसिन सञ्चालनका लागि जापानी
प्राविधिक टोलीले अस्पतालका स्वास्थ्यकर्मीलाई चार दिने विशेष तालिम समेत प्रदान
गर्नेछ। तालिमपछि अस्पतालबाट नियमित रूपमा नयाँ प्रविधिमार्फत टीबी परीक्षण सेवा
सञ्चालन गरिनेछ।
उक्त मेसिन नगर प्रमुख दीपक रिसालको
विशेष पहलमा जापान सरकार, राष्ट्रिय क्षयरोग केन्द्र भक्तपुर, जिल्ला जनस्वास्थ्य कार्यालय काठमाडौं र गोकर्णेश्वर
नगरपालिकाको संयुक्त समन्वयमा गोकर्णेश्वर नगर अस्पतालमा स्थापना गरिएको हो। नगर
प्रमुख रिसालको पहलमा जापान सरकार, राष्ट्रिय क्षयरोग केन्द्र भक्तपुर, जिल्ला जनस्वास्थ्य
कार्यालय काठमाडौं र गोकर्णेश्वर नगरपालिकाबीचको सहकार्यले यो उपलब्धि सम्भव भएको
हो। यसले अन्तरसरकारी तथा अन्तर्राष्ट्रिय सहकार्यबाट स्थानीय स्वास्थ्य सेवा
सुदृढ बनाउन सकिने सकारात्मक उदाहरण प्रस्तुत गरेको छ।
जापानी प्राविधिक टोलीबाट
स्वास्थ्यकर्मीलाई दिइने चारदिने विशेष तालिमले नयाँ प्रविधिको प्रभावकारी सञ्चालन
सुनिश्चित गर्नेछ। आधुनिक उपकरण मात्र पर्याप्त हुँदैन । दक्ष जनशक्ति र नियमित सञ्चालन
नै त्यसको सफलताको आधार हो।
अब आवश्यक कुरा भनेको यस सेवालाई
निरन्तर, गुणस्तरीय र सबै
नागरिकको पहुँचमा पुर्याउनु हो। अन्य स्थानीय तहले पनि गोकर्णेश्वरको यो
अभ्यासबाट सिक्दै आधुनिक स्वास्थ्य प्रविधिमा लगानी बढाउन सके क्षयरोग नियन्त्रण
मात्र होइन, समग्र सार्वजनिक
स्वास्थ्य सेवा सुदृढ बनाउन ठूलो टेवा पुग्नेछ।
