स्थानीय सरोकार/काठमाडौँ । वर्षायामसँगै बढ्दो विपद् जोखिमका बीच तारकेश्वर
नगरपालिकाले जोखिमयुक्त क्षेत्रहरूको स्थलगत अनुगमन, निरीक्षण र तत्काल राहत वितरणलाई प्राथमिकता दिएको छ। नगर प्रमुख कृष्णहरि
महर्जनको नेतृत्वमा प्रमुख प्रशासकीय अधिकृत, जनप्रतिनिधि, प्राविधिक टोली तथा
कर्मचारीहरूको संयुक्त सहभागितामा वडा नं. २, ७, ९ र १० का जोखिम क्षेत्रहरूको
निरीक्षण हुनु सकारात्मक पहल हो।
विपद् व्यवस्थापनमा कागजी योजना मात्र
पर्याप्त हुँदैन। जोखिम क्षेत्रमै पुगेर वस्तुस्थिति बुझ्ने, सम्भावित क्षतिको मूल्याङ्कन गर्ने र तत्काल आवश्यक राहत
उपलब्ध गराउने कार्यले स्थानीय सरकार नागरिकप्रति जिम्मेवार रहेको सन्देश दिन्छ।
प्रभावित परिवारलाई अस्थायी रूपमा त्रिपाल वितरण गर्नु तत्कालीन आवश्यकता सम्बोधन
गर्ने उचित कदम हो।
तर, विपद् व्यवस्थापनको सफलता राहत वितरणमा मात्र सीमित रहनु हुँदैन। जोखिमयुक्त
बस्तीहरूको वैज्ञानिक अध्ययन, पहिरो तथा
बाढी नियन्त्रणका संरचना निर्माण, ढल तथा पानी
निकासको व्यवस्थापन, भू–उपयोग योजनाको
प्रभावकारी कार्यान्वयन र जोखिममा रहेका बस्तीहरूको दीर्घकालीन व्यवस्थापनलाई समान
प्राथमिकता दिन आवश्यक छ।
स्थानीय सरकार, प्राविधिक निकाय र समुदायबीचको समन्वयले मात्र विपद्को
क्षति न्यून गर्न सकिन्छ। नगरस्तरीय योजनाको छलफललाई व्यवहारमा उतार्दै पूर्वसूचना
प्रणाली, उद्धार तयारी र जनचेतनामूलक
कार्यक्रमलाई पनि प्रभावकारी बनाउनुपर्ने आवश्यकता देखिन्छ।
विपद् आइपरेपछि राहत वितरण गर्नु जिम्मेवारी हो, तर विपद् आउनुअघि नै जोखिम न्यूनीकरणका उपाय अवलम्बन गर्नु अझ ठूलो दायित्व हो। तारकेश्वर नगरपालिकाले थालेको यो सक्रियता दीर्घकालीन योजना, पर्याप्त बजेट र निरन्तर कार्यान्वयनसँग जोडिन सके मात्र सुरक्षित र विपद् प्रतिरोधी नगर निर्माणको लक्ष्य हासिल गर्न सकिनेछ।
