काठमाडौं । विवादास्पद व्यवसायी नवीनराज बस्नेतलाई
केन्द्रीय अनुसन्धान ब्यूरो (सीआईबी) ले शुक्रबार राति काठमाडौंस्थित मेरियट
होटलबाट नियन्त्रणमा लिएको छ। सम्पत्ति शुद्धीकरणसम्बन्धी अनुसन्धानको दायरामा
रहेका बस्नेतलाई होटलमा मसाज गरिरहेको अवस्थामा सीआईबीको टोलीले पक्राउ गरेको हो।
शुक्रबार बस्नेतको सम्पत्ति शुद्धीकरण अनुसन्धान विभागमा
तारिख थियो। विभागले नियन्त्रणमा लिएर बयान लिन सक्ने आशंकासहित उनी त्यहाँ पुगेका
थिए। तर, बयान लिएपछि विभागले दशैंपछिको अर्को तारिख दिएर पठायो।
तत्कालका लागि नियन्त्रणमा नपरेपछि उनी ढुक्क हुँदै मेरियट होटल पुगेको स्रोतको
दाबी छ।
विभागबाट बयान दिएर होटल पुगेका बस्नेत मसाज र स्टिम बाथमा
व्यस्त रहेका बेला सीआईबीको टोलीले उनलाई नियन्त्रणमा लिएको बताइएको छ। उनी नियमित
रूपमा मसाज र स्टिम बाथका लागि मेरियट होटल जाने गरेको स्रोतको भनाइ छ।
तर, यो पक्राउसँगै अब अनुसन्धानको घेरा कति
फराकिलो हुन्छ भन्ने प्रश्न उठेको छ। बस्नेतमाथि अनुसन्धान अघि बढिरहँदा उनलाई
जोगाउन प्रभावशाली व्यक्तिहरू सक्रिय भएको दाबीसमेत सार्वजनिक भएको छ।
स्रोतका अनुसार पूर्वाधार विकासमन्त्री सुनिल लम्सालका पीए
पारस, भिक्टर पौडेललगायतको समूह पक्राउ परेका बस्नेतलाई जोगाउने
प्रयासमा लागेको छ। त्यस्तै, बस्नेतसँग सम्पर्कमा रहेका र
विगतमा कथित सेटिङमा संलग्न रहेको दाबी गरिएका केही प्रहरी अधिकृतसमेत उनलाई कसरी
जोगाउने भन्ने विषयमा शक्तिकेन्द्रसँग समन्वय गर्न सक्रिय भएको स्रोतको दाबी छ।
यस विषयमा सम्बन्धित व्यक्तिहरूको आधिकारिक प्रतिक्रिया भने पुष्टि हुन बाँकी छ।अब प्रश्न बस्नेत पक्राउ परे भन्नेमा मात्र सीमित छैन।
अनुसन्धान निष्पक्ष रूपमा अघि बढ्छ कि प्रभाव र पहुँचका आधारमा प्रभावित पार्ने
प्रयास हुन्छ भन्ने नै मुख्य चासो हो। यदि पक्राउ परेका व्यक्तिलाई जोगाउन
राजनीतिक पहुँच, प्रशासनिक सम्बन्ध वा प्रहरीभित्रको सम्पर्क प्रयोग गर्ने
प्रयास भएको हो भने त्यो अनुसन्धान प्रक्रियामाथिकै गम्भीर प्रश्न हुनेछ।
सीआईबी र सम्पत्ति शुद्धीकरण अनुसन्धान विभागले अब
अनुसन्धानलाई कति निष्पक्ष, पारदर्शी र प्रमाणमा आधारित बनाउँछन्
भन्ने कुराले नै घटनाको वास्तविकता स्पष्ट पार्नेछ। पक्राउसँगै कसुर प्रमाणित भएको
मान्न मिल्दैन; तर अनुसन्धान प्रभावित पार्ने कुनै पनि प्रयास भए त्यसको
निष्पक्ष छानबिन हुनु आवश्यक छ।
